АГИКИ устудьуоннара Хаҥалас түмэлигэр

От ыйын 3 күнүгэр биһиэхэ педагогическай наука кандидата, АГИКИ дассыана, РАЕ РФ профессора Евдокия Степановна 5 устудьуоны илдьэ кэлэн ыалдьыттаан, түмэли көрөн-истэн, сэргээн бардылар.


Евдокия Степановна дириҥ билиилээх, ураты көрүүлэрдээх, олус интириэһинэй сэһэннээх киһи эбит. Экспонаттары ымпыктаан-чымпыктаан көрөн, олус үчүгэй наадалаах сүбэлэри биэрэн барда. Ордук мас, туос оҥоһуктарга болҕомтотун уурда. Экспонат уһун үйэлэнэрин наадатыгар итии-оргуйа сылдьар ынах арыытын кутан сотор наадатын сүбэлээтэ. Сорох экспонаттар олус сыаналаах былыргылар эбит диэтэ.


Кини илдьэттии кэлбит оҕолоро 2021 сыллаахха арыллыбыт музееведение салаатын бастакы устудьуоннара буолаллар эбит. Оҕолор хаартыскаҕа түһэрэр ньымаларга, экспонат былыргытын быһаарарга үөрэнэ сылдьар эбиттэр. Түмэлбитин олус интириэһиргээн, көрөн-билэн бардылар.
Евдокия Степановна устудьуоннарыгар үчүгэйдик өйдөнүмтүө буоларын курдук, лоп баачы быһааран биэрэр, хайдах быһыылаахтык хаартыскаҕа түһэрэри ыйан-кэрдэн биэрэр.
Аатырбыт Сата уустарыгар ананан оҥоһуллубут памятникка сылдьан сөҕөн-махтайан көрдүлэр.


Евдокия Степановна 2023 сылга улахан проект бэлэмнии сылдьарын кэпсээтэ уонна сатаннаҕына Ньурбатааҕы К.Д. Уткин аатынан Доҕордоһуу түмэлин кытта үлэлиир былааннааҕын билиһиннэрдэ. Оччоҕо биһиги В.А. Петрова аатынан кыраайы үөрэтэр түмэлбит, Ньурбаҕа филиал буоларын быһыытынан,тэҥҥэ үлэлэһиэхпит диэн барда.

В.А. Петрова аат. Кыраайы үөрэтэр түмэл