Үмүөрүһэр күн үүннэ.

Егоров Василий Дмитриевич-Айах Баһылай, аатырбыт норуот ырыаһыта, оһуокайдьыт, олоҥхоһут.

Эһээкэйдиир эһээкэй,

Истиҥ эрэ сэгэрдэр!

Хатан дьыбар халбарыйан,

Уохтаах тыынын ууратан,

Тымтар тоҥот бытарыйан,

Көмүрүө мууһум көтүллэн,

Суллур мууһум сулбуруйан,

Хамсаат мууһум халбарыйан,

Толоонум уута доллоһуйан,

Силиһим уута сиэтиллэн,

Кыстык хаары кыйдаата,

Сандал сааһы ыллатта.

Арай биирдиир сарсыарда

Түлүктээхэй түүммүттэн

Түүлүк уутун бүтэрэммин

Төлөн-мөҥөн турдум дьэ,

Иллээх үтүө таҥаспын

Санным үөһэ уурунан

Сандалы мууһа тиэргэммэр

Тахсан көрөн турбутум.

Тустуур соҕуруу диэкиттэн

Кылбайан көстөр түүлэрдээх

Кырааскалаах тумустаах,

Кылдьыылардаах харахтаах,

Үрүҥ көмүс өрөҕөлөөх,

Уулаах көмүс уорҕалаах,

Тардыы көмүс дабыдаллаах,

Эчэл доҕор оҕолор

Сатаҕай тыллаах киһи дьэ,

Сааһын булан саҥарбат

Сатаан эппэт, ыллаабат

Кыталык көтөрүм кынтайда,

Кырдал устун дугунна,

Кылыкыныы кыланна.

Даллаҥнаатын кытары

Дойдум ньуура тубуста,

Сирим-дойдум мичээрдэ.

Мастарыгым төбөтүгэр

Бачыыс солко баалынна,

Титиригим төбөтүгэр

Нэлим солко тэлимнээтэ.

Үрүйэм үүнэр ойоҕоһугар

Үтүө дойдум ньууругар

Үрүҥ күммүт уһаата,

Үөрүү кытта үксээтэ.

Маннык мааны дойдуга

Эһээкэйдиир кэм кэллэ,

Үтүө дьикти дойдуга

Үмүөрүһэр күн үүннэ.

Эһиги эмиэ мин курдук

Аҕыс уоннаах саастарга,

Алгыс тыллаах буолаарыҥ,

Иэйэ-туойа сылдьаарыҥ!

Василий Егоров-Айах Баһылай,

В. Лосотов устуута.

“Коммунизм суола”, бэс ыйын 16 күнэ

1987 сыл.