Хаҥаласка Кыайыы күнүн көрсүү

 Хаҥалас нэһилиэгэр Аҕа дойдуну көмүскүүр Улуу​ сэриигэ ньиэмэс-фашист талабырдьыттары​н кыайыы 76 сылыгар аналлаах үөрүүлээх тэрээһин уоттаах сэриигэ​ уһулуччу хорсун быһыыны көрдөрөн Бойобуой уордьаннарынан наҕараадаламмыт​ буойуннарга анаммыт памятник — стеллалаах​ стендэ аһыллыытынан саҕаланна. Манна уордьаннаах буойуннар хаартыскалаах, ааттаах-суоллаах​ гранитнай плиталара туруоруллубуттар. Бу өйдөбүнньүк​ кэнчээри ыччаттарга Хорсун быһыы туоһутунан буолан өрүүтүн сырдыгынан сыдьаайа туруохтун!

Тыыл ветераннарын, сэрии сылын оҕолорун нэһилиэк баһылыга С.А.Винокуров ыалларынан сылдьан эҕэрдэлээтэ. Кинини арыаллаатылар квадрациккыллар уонна бырааһынньыктыы киэргэммит УАЗ фермер массыына үөһээ туран сэрии сылларын  ырыаларынан, музыкаларынан доҕуһуолланан КЦ» Тойук» үлэһиттэрэ ветераннарга анаммыт эҕэрдэ тыллары доргуччу саҥаран дэриэбинэни эргийдилэр.

Күн иккис аҥаарыгар Атах  диэн сиргэ туруоруллубут памятникка — сэрииттэн эргиллибэтэх 14 саллааттар  ааттара көмүс буукубанан суруллан  турар өйдөбүнньүктэринэн кэриэстээн, сүгүрүйэн гирлянда уурдубут.  Баһылык өстөөҕү утары кыргыһыыга эдэркээн олохторун толук уурбут биир дойдулаахтарбыт ааттара хаһан да умнуллубатыннар диэн тыл эттэ.

Мииһээн сыһыытын үрдүгэр турар киэҥ өтөххө  Аҕа дойду Улуу сэриитигэр 4 бырааттыы уолаттар Леонтий, Николай, Павел, Михаил  Кылатчановтар сырдык ааттарыгар оҥоһуллубут Мэҥэ бэлиэҕэ гирлянда уурдубут. Аан бастакы хомуурга барбыт улахан уол Леонтий 1943 с. сураҕа суох сүппүт. Атын 3 уол этэҥҥэ эргиллэн кэлэн эйэлээх олоҕу тутуспуттара. Элбэх үтүө ыччаттары хаалларбыттара. Түөрт буойуну сэргэ убайдара Степан, эдьиийдэрэ Мария тыылга хаалан Кыайыы туһа диэн тоҥору, аччыктыыры аахсыбакка үлэлээбиттэрэ.

Ыам ыйын 8 күнүгэр Сататтан сэриигэ барбыт буойуннарга анаммыт памятникка 9, 10 кылаас оҕолорун илдьэ баран кэллибит. Оҕолорго сэриигэ барбыт аҕалаах уол Андрей Яковлев уонна Николай Григорьев тустарынан Анисимова Зинаида Васильевна кэпсээтэ. Дьоллоох дьон буолан иккиэн  тыыннаах эргиллэн кэлбиттэрэ.

Анисимова З.В.