Хаҥаластар Өрөспүүбүлүкэ күнүн бэлиэтээтилэр

Муус устар 27 күнүгэр Өрөспүүбүлүкэ күнүгэр аналлаах тэрээһин сарсыарда Үөдэй нэһилиэгэр Варвара Андреевна Петрова сквер-уһаайбатыттан саҕаланна. Кини памятнигар үөрүүлээх тэрээһиҥҥэ улуус баһылыга Алексей Иннокентьевич Иннокентьев эҕэрдэ тыл эттэ. Үөдэй нэһилиэгин баһылыга Мария Пудовна Николаева, В.А.Петрова аатынан музей сэбиэдиссэйэ Зинаида Васильевна Анисимова эҕэрдэ тыл эттилэр. Варвара Андреевна памятнигар кэлбит дьон бары сибэкки дьөрбөтүн уурдулар.

16.00 чаастан Zoom платформа нөҥүө музей тэрээһинин ыыттыбыт. Кыттыыны 6-9-с кылаастартан 17 үөрэнээччи ыллылар. Өрөспүүбүлүкэ күнүн бырааһынньыгын историческай суолтатын туһунан З.В. Анисимова кэпсээтэ, иккис чааһыгар дойдубут историятыгар, айылҕатыгар, кыылыгар, үүнээйитигэр аналлаах викторинаны оскуола библиотекара Г.Н. Антонова бэлэмнээн ыытта. Оҕолор олус интириэһиргээн көхтөөхтүк кытыннылар. Викторина түмүгүнэн кыайыылаах 9-с кылаас үөрэнээччитэ Олеся Петрова өйдөбүнньүк  бэлэх тутта.

Саха Республикатын күнүгэр аналлаах нэһилиэк иһигэр куйаар ситимин нөҥүө ыытыллыбыт пазл күрэҕэр Алексеев Борислав 27 сөкүүндэнэн хомуйан кыайыылааҕынан таҕыста. Киниэхэ түмэл аатыттан бэлэх туттарылынна.

Анисимова З.В.