Ааттаах оһуокайдьыт, норуот ырыаһыта Ньукутта

Хаҥалас нэһилиэгин олохтооҕо Николай Николаевич Егоров-Ньукутта быйыл 2021 сылга 100 сааһын бэлиэтээн араас тэрээһиннэр буолаллара былааннанар.

     Ньукутта уонча сааһыттан бэйэтэ айан туойар, оһуокай тыла этэр буолбута. Сэттэ уонча сыл ыллаан-туойан аастаҕа. Норуот биһириир хомоҕой тыллаах тойуксута, хараҕын симэн этэн-тыынан хоҥкулдьуйан киэҥ түһүлгэлээх оһуокайдьыт. Үтүмэн үгүс конкурстарга кыттан, оройуон, өрөспүүбүлүкэ сыаналарыгар тахсан мэлдьи күүтүүлээх ыалдьыт буолара.

     Н.Н. Егоров-Ньукутта «Норуот ырыаһыта» үрдүк ааты ылбыта.

     Байанайдаах булчут уһун кэмҥэ кадровай булчутунан «Марха» совхозка үлэлээбитэ. Нэһилиэккэ улахан тутуулар бары Ньукутта сатабыллаах илиитинэн тутуллубуттара. Айылҕаттан бэриллибит туойар-ыллыыр талааныгар эбии туруу үлэһит, кыахтаах киһи буолан, ханна да үлэлээбитин иһин мэлдьи хайҕалга сылдьара.

Кини үлэтэ сыаналанан Ньурба улууһун уонна Хаҥалас нэһилиэгин Бочуоттаах олохтооҕо үрдүк ааты ылбыта, сэрии уонна үлэ ветерана буолбута.

Биһиги музейбытыгар Егоров Н.Н.-Ньукуттаҕа анаан быыстапка туруордубут. Манна кини анал бэлиэлэрэ, Бочуотунай грамоталара, бириистэрэ – чорооннор турдулар. Ону таһынан булка кэппит тугут тириититтэн кичэллээхтик тигиллибит саҥыйаҕа, таба тыһа бүүппэх уонна кылтан бэйэтэ оҥорбут куйуура, от тардар мас тордуога туруорулуннулар. Ыһыахтарга барарыгар, концертарга илдьэ сылдьар былыргы саквояһа турда.

З.В. Анисимова