Хаҥаласка В.А. Петрова аатынан эстафета

Кулун тутар 20 күнүгэр Хаҥаласка Варвара  Андреевна Петрова  төрөөбүтэ 85 сылыгар аналлаах оройуон эстафетата ыраах Мэҥэдьэк нэһилиэгиттэн тиийэн кэллэ.

Делегация салайааччыта нэһилиэк баһылыгын солбуйааччы Елена Федоровна Саввинова, кинини кытта общественник, Хатыы нэһилиэгин Бочуоттаах олохтооҕо, » Дархан этээччи» Тамара Григорьевна Дмитриева, Култуура киинин директора Ларьяна Васильева, эдэр  ырыаһыт Дмитрий Попов бааллар.  Мааны ыалдьыттары ″Алаас Хотуна″ эбээлэр  түмсүүлэрэ арыылаах алаадьынан,кырылыы көөнньүбүт кымыһынан айах тутан көрүстүлэр. Нэһилиэк баһылыга ыалдьыттары эҕэрдэлээтэ, өйдөбүнньүк сувенир туттарда. Ыалдьыттар ааттарыттан эҕэрдэ тылы Тамара Григорьевна уустаан- ураннаан эттэ. Эстафета альбомун Елена Федоровна нэһилиэк  баһылыгар Серафим Александровичка туттарда.

Ыалдьыттар Н.И. Кочнев аатынан орто оскуолаҕа сырыттылар. Кинилэри оскуола директора Леонид Николаевич Васильев, оскуола иитэр үлэҕэ завуһа Анна Владимировна Васильева, библиотекарь Галина Никитична Антонова истиҥник көрүстүлэр. Оскуола үлэтин-хамнаһын билиһиннэрдилэр, библиотекаҕа сылдьан кыра кинигэлэр уонна сувенирнай чараппаахылар коллекцияларын көрдөрдүлэр. Салгыы В.А.Петрова аатынан кыраайы үөрэтэр түмэлгэ ыалдьыттаатылар.

Программа иккис аҥаарыгар төгүрүк остуол буолла. Варвара Андреевнаны кытта биир кэмҥэ үлэлээбит, кинини  үчүгэйдик билэр дьоннор уонна эдэрдэр эмиэ кыттыыны ыллылар.Дьаһалта специалиһинэн өр сылларга үлэлээбит Александра Петровна Васильева олус иһирэх тылынан ахтан-санаан ааста, эдэрдэргэ туһаайан  Варвара Андреевна хайдах курдук туруу үлэһитин, киһи быһыытынан чиэһинэйин тоһоҕолоон бэлиэтээтэ. Видеосибээһинэн истиҥ-иһирэх тыллары Дьокуускай куораттан нэһилиэк баһылыгынан үлэлээбит Николай Васильевич Николаев, оройуон ЗАГС-тыгар уонна республиканскай ЗАГС-ка начальнигынан үлэлээбит Валентина Васильевна Сартаева истиҥник ахтан санаан эттилэр.

Библиотекарь Мария Николаевна Варвара Андреевнаҕа ананан тахсыбыт кинигэлэр тустарынан  быыстапка туруоран кэпсээтэ.

Түмэл пресс-сулууспата