Хаҥаласка тимири уһаардылар

Ньурба уустарын Ассоциациятын бэрэссэдээтэлэ, Ньурба улууһун уонна Саха республикатын норуотун маастара Афанасьев Ариан Васильевич-Арыйаан Уус көҕүлээһининэн уонна Ньурбатааҕы К.Д. Уткин аат. Норуоттар доҕордоһуулара түмэлин филиала В.А Петрова аатынан түмэл кыттыылаах Хаҥаласка 7-с төгүлүн Сата тимирин  уһаарыы ыытылынна. Сыала-соруга: Кэнтиккэ ыытыллыахтаах республикатааҕы Уустар күрэхтэригэр бэлэмнэнии буолар. Бу уһаарыыга Ньурбаттан төрүттээх уустарбыт кытыннылар: Покровскайтан Васильев Александр Владимирович-Байдам Уус үөрэппит уолун Никифоров Андрей Петровичтыын; Ньурбаттан Саввинов Иван Иванович; Хатыыттан Тимофеев Иван Прокопьевич; ыраах Өлөөн улууһуттан Шарин Виктор Викторович-Быыкаа Уус; Үөһээ Бүлүү Хоротуттан Тыымпы Ньургун Дондо уола уонна Иванов Василий Александрович  —  саҥа саҕалаан эрэр уустар.

Афанасьев А.В.-Арыйаан Уус

Солбуллубат күөрдьүт Сата уустарыттан төрүттээх, Сыраан Уус хос сиэнэ Григорьев Борис Николаевич- Быралгы Барыыс уонна эдэр уус Баишев Александр Анастасович кыһа уотун биир кэмҥэ туттулар.

Көмөр уонна тимирдээх таас кутуллар бириэмэтэ бэлиэтэнэр
Көмөрү кутуу
Болгуо
Эллээһин

Сарсыарда уһаарар  оһох тиийэн 11:15 мүн. бастакы көмөр уонна тимирдээх таас кутулунна. Күүстээх уһун үлэ саҕаланна. Уон биэстии мүнүүтэ буола-буола көмөр, онтон таастаах тимир кутуллан,тохтоло суох күөрт күпсүйэн киэһэ 7 чааска уһаарыы бүттэ. Биир чаас оһох сойорун кэтэһэр долгутуулаах кэм буолла. 8 чааска оһох аанын үлтүрүтэн болгуо хостооһуна саҕаланна. Кытаҕас кытаанаҕы таарыйан — баар эбит диэн сибигинэһии буолла. Син бөдөҥ болгуону хостоон таһааран эллээһин саҕаланна. Төһө ыйааһыннаах буолуой диэн сабаҕалааһын буолла. Барыта 31,5 киилэ тимирдээх таастан 8 киилэ ыраас болгуо тахсыбыт.

Бу уһаарыы Республикаҕа быйылгы дьылга бастакы уһаарыы буолар.

Анисимова З.В.