Сэргэх ыалдьыттар

Ньурбатааҕы музей филиалыгар В.А. Петрова аат. кыраайы үөрэтэр музейга бэрт сэргэх ыалдьыттар сылдьан аастылар.

Бу Ньурба куорат олохтоохторо Петрова Софья Егоровна, Яковлева Мария Егоровна, Яковлева  Ньургуйаана Павловна. Кинилэр үһүөн бастаан скандинавскай хаамыынан үлүһүйбүттэр, онтон хайыһарынан, саас халлаан сылыйбытын кэннэ  велосипедынан утумнаахтык дьарыктаммыттар уонна быйыл сайын Ньурба куорат чугаһынааҕы нэһилиэктэригэр барытыгар тиийэ сылдьыбыттар. Бүгүҥҥү айаннарыгар анаан- минээн Хаҥалас музейыгар сылдьан ааһар былааннаахтар эбит. Ыалдьыттарбыт үгүс кэпсээннээхтэр, Варвара Андреевнаны үчүгэйдик билэллэр эбит. Киниэхэ анаммыт  заалы  үчүгэйдик сэҥээрэн көрдүлэр. Ол кэннэ тимир уустарын уонна тимири уһаарыыны Ариан Уустан ыйыталаһан , экспозициялары болҕомтолоохтук көрдүлэр,уһаарыы туһунан олус сэҥээрдилэр.

Тус бэйэм былыргы малы-салы эчи үчүгэйдэрин диэн  эмоциональнайдык көрөллөрүттэн олус  астынан туран кэпсээтим. Кырдьык да, сылдьыахха эрэ диэн буолбакка, чахчы интириэһиргээн көрөр дьоҥҥо кэпсиир   чэпчэки баҕайы, хайдах эрэ бэйэтэ-бэйэтиттэн тахсар…

 Ыалдьыттарбыт налыччы көрөн,сэҥээрэн салгыы айаннаатылар. Түүкээҥҥэ тиийэн тутулла турар муостаны көрөн- истэн төннөр былааннаахтар. Бу кэрэ аҥаардар бары пенсияҕа тахсан баран, олорон хаалбакка сөптөөх дьарыгы булан үөрэ-көтө сылдьаллара киһини кэрэхсэтэр.

Анисимова З.В.