Хаҥаласка дьиэ кэргэн күнэ

Дьиэ кэргэн күнүн бэлиэтиир буолбуттара аҕыйах сыл буолла. Дьиэ кэргэн — уопсастыба сүрүн тутааҕа. Уопсастыба сайдыыта дьиэ кэргэн элбэх оҕолоох, сылаас дьиэлээх, иитиллэн олорорго сөптөөх хамнастаах буоллаҕына улахан тутулуктанар.

    Уопсастыба нус-хас олохтоох ыаллардаах, элбэх ыччаттардаах буоллаҕына —  ол аата инникигэ эрэллээх. Дьиэ кэргэн оҕонон дьоллоох. Эһээлээх эбээ, ийэлээх аҕа уопсастыба инники сайдыытын түстүүр улахан суолталаах ытык эбээһинэһи толороллор. Тапталынан толору дьиэ кэргэҥҥэ иитиллибит оҕо ис хааныттан налыччы майгылаах, киэҥ көҕүстээх, уһуну-киэҥи анаарар киһи буолан тахсар.

Хаҥалас түмэлигэр Дьиэ кэргэн күнүгэр анаан дьиэ кэргэн өбүгэлэртэн кэриэс гынан илдьэ сылдьар малларын быыстапката турда. Быыстапкаҕа эбэтиттэн кыыһыгар, кыыһыттан сиэнигэр бэриллэн иһэр дьиэ кэргэн ытык иһитэ-хомуоһа турда. Ол курдук Семенова Елена Васильевна 1890 с.т. мельхиор хаппахтаах иһитэ, Иванова Марфа Ивановна 1913с.т. кыһыл көмүс ытарҕата, Никифорова Аграфена Семеновна 1932с.т. иистэнэр иһитэ уо.д.а мал дьон көрдөрүүтүгэр таҕыста.

Нэһилиэк уран тарбахтаах иистэнньэҥэ Васильева Евдокия Михайловна «Ийэ кыыһынаан» тиэмэнэн панно оҥорорго маастар-кылаас көрдөрдө.

Ону таһынан дьиэ кэргэн чөл олоҕун, үлэтин-хамнаһын көрдөрөр хаартысканан быыстапка турда. Нэһилиэк олохтоохторо көхтөөхтүк кытыннылар.

Түмэл пресс-сулууспата

Дьиэ кэргэн ууруу малларын быыстапката
«Дьиэ кэргэн — дьол уйата» хаартыска быыстапката
«Ийэ кыыһынаан» маастар-кылаас