″Россия судаарыстыбатын бэлиэлэрэ″ тэрээһин

В.А. Петрова аат. кыраайы үөрэтэр түмэлгэ Россия күнүгэр анаан эдэр ыччаттарга «Россия судаарыстыбатын символлара» диэн тематическай тэрээһин буолла. Тэрээһини ыыттылар түмэл уонна нэһилиэк библиотекатын үлэһиттэрэ.

         Эрдэ «Мин Ийэ дойдум Россия» диэн онлайн-викторина нэһилиэккэ ыытыллыбыта. Россия историятын кэрэһэлиир «России великая судьба» диэн кинигэ выставката туруорулунна. Түҥ былыргыттан элбэх араас омук түмсэн олорбут Россия государствотын историятын уонна символларын туһунан Анисимова З.В. кэпсээтэ. Ол кэнниттэн олохтоох библиотекарь Мария Николаевна викторина ыытта.

         Биһиги нэһилиэк ыччата, тыа хаһаайыстыбатын техникумун студена Васильев Владимир аҕыйах хонуктаахха Россия армиятыгар ытык иэһин төлөөн сулууспалаан кэлбитэ. Кини Приморскай кыраай Уссурийскай куоратыгар Воздушно-Десантнай сэриилэр гаубично-артиллерийскай дивизионугар сулууспалаан кэллэ. Сулууспалыыр чааһыгар элбэх омуктаах Россия араас регионнарыттан ыҥырыллыбыт уолаттар Ийэ дойдуларыгар ытык иэстэрин чиэстээхтик толордулар. Биир сыл устата саха, нуучча, дагестан уолаттара олус иллээхтик, көхтөөхтүк сулууспалаабыттарын Владимир үөрэ-көтө кэпсиир. Ордук чугастык Дагестантан сылдьар уолу кытта табаарыстаспытын истиҥник саныыр.

         Онтон ыччаттар «Россия устун айан» диэн ааттаах остуол оонньуутугар олус көхтөөхтүк кытыннылар. Россияҕа баар уратылаах тутуулары, памятниктары, айылҕа ытык кэрэ миэстэлэрин таайыы тыҥааһыннаахтык ааста. Студеннар Милена Иванова, Саша Филиппов уонна ыччат лидера Анжелика Васильева элбэх боппуруоска эппиэттээн киэҥ билиилээхтэрин көрдөрдүлэр. Кыайыылаахтар сэмэй бириистэри туттулар.

Түмэл пресс-сулууспата